យ៉ាងហោចណាស់ កម្មករ៤នាក់ត្រូវបានរាយការណ៍មកថាស្លាប់ ៣០នាក់រងរបួសធ្ងន់ស្រាល និង១១នាក់ទៀត ត្រូវបានបញ្ជូនខ្លួនទៅបញ្ជាការដ្ឋានកងរាជអាវុធហត្ថ រាជធានីភ្នំពេញ ខណៈកម្លាំងសមត្ថកិច្ចបង្ក្រាបទៅលើក្រុមកម្មករ ដែលធ្វើបាតុកម្មទាមទារដំឡើងប្រាក់ឈ្នួលគោល ១៦០ដុល្លារ នៅសួនឧស្សាហកម្មកាណាឌីយ៉ា ផ្លូវវ៉េងស្រេង សង្កាត់ចោមចៅ ខណ្ឌដង្កោ រាជធានីភ្នំពេញ។ តាមសេចក្តីរាយការណ៍ របស់អ្នកយកព័ត៌មានVOD នៅ
កន្លែងកើតហេតុ បានឲ្យដឹងថា ការប៉ះទង្គិចគ្នារវាងកម្លាំងសមត្ថកិច្ច និងកម្មករមកពីរោងចក្រនានា នៅរាជធានីភ្នំពេញ បានកើតចាប់តាំងពីម៉ោង១០ព្រឹកថ្ងៃសុក្រនេះ ហើយសមត្ថកិច្ចបានឈានទៅដល់ការបាញ់រះមកលើកម្មករ បណ្តាលឲ្យកម្មករ ៤នាក់ស្លាប់ និង៣០នាក់រងរបួសធ្ងន់និងស្រាល និង១១នាក់ទៀតត្រូវបានចាប់ខ្លួនបញ្ជូនទៅកាន់បញ្ជាការដ្ឋានកងរាជ អាវុធហត្ថរាជធានីភ្នំពេញ។ ទោះជាយ៉ាងណា អ្នកសារព័ត៌មាន ត្រូវបានហាមមិនឲ្យថតរូប ហើយសូម្បីប្រជាពលរដ្ឋដែលធ្វើដំណើរឆ្លងកាត់ទីនោះ ក៏រងការបាញ់បណ្តេញចេញពីទីនោះផងដែរ។ សាក្សី និយាយថា សមត្ថកិច្ចបានភ្ជង់កាំភ្លើងភ្ជង់ម្ចាស់ផ្ទះ ល្វែងម្តុំមន្ទីរពេទ្យឯករាជ្យ ដើម្បីឡើងទៅលើផ្ទះនោះ បាញ់មកលើបាតុករ ពីរនាក់ ម្នាក់ចំក្បាល និងម្នាក់ទៀតចំកណ្តាលទ្រូងស្លាប់ភ្លាមៗ។ ចំណែកបាតុករម្នាក់បានស្លាប់នៅតាមផ្លូវ ពេលដែលដឹកទៅមន្ទីរពេទ្យ ខណៈម្នាក់ទៀតស្លាប់នៅមន្ទីរពេទ្យ។បាតុករដែលស្លាប់សុទ្ធជាបុរស ខណៈបាតុករជាស្ត្រីត្រូវកម្លាំងប្រដាប់អាវុធ វាយទាត់ធាក់។ សាក្សី ឃើញផ្ទាល់ភ្នែក និយាយថា កម្លាំងប្រដាប់អាវុធ បានចាប់បាតុករដែលរត់ចូលផ្ទះពលរដ្ឋអុសទម្លាក់ពីលើផ្ទះ មកវាយបំបាក់ភ្លៅនៅលើថ្នល់។ សេចក្តីរាយការណ៍ពីកន្លែងកើតហេតុ ឲ្យដឹងថា មន្ទីរពេទ្យឯកជនមួយ ដែលមានយីហោ មន្ទីរសម្រាកព្យាបាលឯករាជ្យ នៅផ្លូវវ៉េងស្រេង ត្រូវបានក្រុមកម្មករវាយកម្ទេចកញ្ចក់ទ្វារ និងបង្អួច ព្រមទាំងបរិក្ខាពេទ្យមួយចំនួន ខណៈកម្មករអះអាងថា មន្ទីរពេទ្យនេះមិនព្រមព្យាបាលកម្មករដែលរងបួស នៅក្នុងហេតុការណ៍ប៉ះទង្គិចគ្នារវាងកម្លាំងសមត្ថកិច្ចរាប់រយនាក់។ រហូតមកដល់ម៉ោងជាង៣រសៀលនេះ ស្ថានការណ៍បានស្ងប់ស្ងាត់បន្តិច ដោយកម្លាំងសមត្ថកិច្ចបានគ្រប់គ្រងតំបន់នោះ ហើយក្រុមកម្មករបានបំបែកគ្នាជាបណ្តើរៗ ចេញពីមុខសួនឧស្សាហកម្មកាណាឌីយ៉ា៕
Post a Comment